Ang administrasyon ni Presidente Ferdinand Marcos Jr. sa Pilipinas naghimog mga kalamboan sa tawhanong katungod sa 2024 apan napakyas sa pag-atiman sa mga nangagi ug nagapadayong mga kalapasan, ang Human Rights nagkanayon karong adlawa sa iyang World Report 2025. Ang mga pagpatay sa “gubat kontra droga” nagpabilin, apan walay aksyong legal ang gihimo batok sa mga kanhing opisyal sa kanhing administrasyon ni Rodrigo Duterte bisan pa man sa bag-ong ebidensya sa mga abuso.
Alang sa 546 ka pahinang world report, ang ika-35 nga isyu, ang Human Rights Watch nagrepaso sa mga hinimoan kalabot sa tawhanong katungod sa sobra 100 ka nasud. Sa dakong bahin sa kalibutan, nagsulat si Executive Director Tirana Hassan sa iyang pasiunang salaysay, ang mga gobyerno nigukod, nidakop ug nibilanggo sa mga kaatbang politikal, aktibista, ug peryodista sa paaging dili makatarunganon. Ang mga armadong grupo ug pwersa sa gobyerno nipatay sa mga sibilyan sa paaging supak a balaod, nag-abog kanila sa ilang mga panimalay, ug nibabag sa hinabang alang sa ilang kaayohan. Didto sa kadaghanan sa sobra 70 ka nasudnong piliay sa 2024, ang mga mahariharion nga lider nakaangkon og dugang kusog gamit ang ilang mga pulong ug polisiya nga adunay pagpihig.
“Samtang si Presidente Marcos naghatag og positibong mensahe nga tuyo niya ang pag-atiman sa mga seryosong kabalaka mahitungod sa tawhanong katungod sa Pilipinas, kinahanglan niyang tugbangan ang iyang mga pulong og aksyon,” nagkanayon si Bryony Lau, deputy Asia director sa Human Rights Watch. “Ang mga bag-ong pagpadayag mahitungod sa papel sa mga taas nga opisyal sa administrasyong Duterte ug mga opisyal sa kapulisan sa mga kabangis sa “gubat kontra droga” nagpatumaw sa panginahanglan alang sa malangkubong mga reporma sa pagpatuman sa balaod.”
- Ang Department of Justice nagmugnag usa ka task force sa Nobyembre aron imbestigahan ang mga pagpatay sa “gubat kontra droga” human ang makapakurat nga mga pagdungog sa Kongreso nga nagsugod sa Agosto, mahitungod sa papel sa kapulisan, ug ang pag-angkon ni Duterte nga aduna siyay “death squad” samtang mayor sa Dakbayan sa Davao ug, isip presidente, “nagdasig” sa kapulisan sa pagpatay og mga suspek sa droga.
- Ang kapulisan ug wala nailang mga tig-atake nipatay sa 263 ka suspek sa droga sa Pilipinas gikan sa Enero hangtud Nobyembre 15, 2024, sigun sa usa ka grupong lokal nga tigmonitor. Sukad nilingkod si Marcos niadtong Hulyo 1, 2022, 841 na ang namatay sa mga pagpatay lambigit sa droga.
- Walay kalamboan diha sa tulubagon alang sa mga pagpatay sa “gubat kontra droga” sa 2024, tungod kay aduna lamang upat ka kaso gikan sa 2018 nga nakonbikto ang mga pulis. Ang International Criminal Court padayon pang nag-imbestiga sa posibleng mga krimen batok sa katawhan sa “gubat kontra droga” sa Pilipinas, apan ang administrasyong Marcos nagdumili sa pakigtinabangay sa korte.
- Ang mga awtoridad nanghasi ug nagkiha, nga walay basehan, sa mga aktibistang civil society pinaagi sa “red-tagging,” ang makuyaw nga hinimoan nga ang mga individwal o organisasyon ingnon nga adunay kalambigitan ngadto sa komunistang insurhensya. Ang mga grupo sa tawhanong katungod nagtaho og upat ka bag-ong kaso sa pinugos nga pagkahanaw sa 2024. Daghan sa mga biktima mga aktibista, apil ang mga tigpanalipod sa yuta ug kalikupan.
Angay ipatuman ni Presidente Marcos ang malangkubong mga reporma nga gikinahanglan aron molambo ang kahimtang sa tawhanong katungod sa nasud, nagkanayon ang Human Rights Watch. Ang mga kaubang internasyonal sa Pilipinas angay moawhag sa kagamhanan sa pagkab-ot og tulubagon alang sa mga abusong nahimo sa “gubat kontra droga,” mga pagpatay nga dili subay sa balaod, ug mga pinugos nga pagkahanaw.
